နာရီလက်တံတို့ မည်သည် ပြောင်းပြန်လည်ရိုး ထုံးစံမရှိ

Written by ဟန်ဆန်း

Wednesday, 07 July 2010 13:00

Share |

ကိုယ့်ဘ၀ထဲကို နာရီတွေ တစ်လုံးပြီး တစ်လုံး ၀င်လာတတ်တယ်။ ငယ်စဉ်ကလေး ဘ၀ကတည်းက ဆိုပါတော့။

နာရီလှလှ ကောင်းကောင်းတွေ ကိုမှ ကိုယ်က မက်မောတတ်တာ မဟုတ်။ ကိုယ့်အနားမှာ နာရီ ရှိနေမှ ကိုယ့်အတွက် အဆင်ပြေတယ်။ ကိုယ်က အလုပ် လုပ်ရမယ့် အချိန်တွေကို သိချင်တယ်။ အချိန်တွေက ညီမကို ထိန်းချုပ်ထားတာ မကြိုက်ဘူး။ ကိုယ့်ကို သူမ ပြောခဲ့ဖူးတယ်။ သူမ နာရီပတ်လေ့ မရှိ။ အချိန် သိချင်ရင် သူမက ကိုယ့်ကို ဘယ်နှနာရီ ထိုးပြီလဲလို့ မေးတတ်တယ်။

ကိုယ့်ကို နာရီတွေနဲ့ မိတ်ဆက် ပေးခဲ့သူက ကိုယ့်အဖေ။ အဖေက နာရီထဲမှာ စီကိုဖိုက်ကို ခရေစီ ဖြစ်တယ်။ ဒီနာရီက မင်းထက် အသက်ကြီးတယ် ကွ။ အဖေက သူပတ်ထားတဲ့ စီကိုဖိုက် နာရီအိုလေးကို ပြပြီး ပြောလေ့ရှိတယ်။ အဖေ့ရဲ့ နာရီလေးက ခုထိ ကောင်းတုန်း။ သွားနေတုန်း။ အဖေတို့ ခေတ်က ပစ္စည်းကောင်းလေးတွေ ရှားတယ် ထင်ပါရဲ့။ အဖေ့ နာရီလေးက သူ့ခေတ် သူ့အခါတုန်းက တန်ဖိုးတစ်ခု ရှိခဲ့လိမ့်မယ်။ သိပ်တန်ဖိုးကြီးပြီး သိပ်ဈေးကြီးတဲ့ နာရီတော့ မဟုတ် လောက်ဘူး။ ဈေးကြီးတာတွေ ဈေးနည်းတာတွေက တစ်ပိုင်းလေ။ နာရီက သူ့တာဝန်ကျေရင် ပြီးတာပဲ။

ကိုယ့်က အမှတ်တရ ပစ္စည်းလေးတွေ၊ ရှေးဟောင်း ပစ္စည်းတွေဆိုရင် နည်းနည်း စိတ်ဝင် စားတယ်။ သိမ်းထားချင်တယ်။ ကိုယ်ငယ်ငယ်က ကိုယ်တို့နေခဲ့တဲ့ အိမ်မှာ ချိန်သီးနဲ့ တိုင်ကပ် နာရီတစ်လုံး ရှိခဲ့တယ်။ ချိန်သီးက ဘယ်ကနေ ညာ၊ ညာကနေဘယ်၊ အချိန်မှန်မှန် လှုပ်နေ တတ်တယ်။ အချိန်တစ်နာရီ ပြည့်သွားတိုင်း ဒင် ဒင် ဒင် ဆိုပြီး သူရောက်နေတဲ့ အချိန်ကို အသံပေး ညွှန်ပြလေ့ ရှိတယ်။ ကိုယ့်အမေက ပြောတယ်။ ကိုယ်မွေးကင်းစက ချိန်သီး နာရီကြီး ဒင် ဒင် မြည်ရင် ကိုယ်က လန့်တတ်တယ်။ ငါ့သားက အသည်း သိပ်ငယ်တာပဲ။

ချိန်သီး နာရီကြီးက ကိုယ့်ကို ကျောင်းတက်ဖို့၊ ထမင်းစားဖို့၊ ရေချိုးဖို့၊ အိပ်ရာဝင်ဖို့၊ အိပ်ရာထဖို့ အမြဲတမ်း သတိပေး နှိုးဆော်ခဲ့တယ်။ နာရီသံ တဒေါင်ဒေါင်၊ တဒင်ဒင်ဟာ ကိုယ့်ဘ၀ကို တက်ကြွစေဖို့ မသိမသာ သွေးထိုး ပေးခဲ့တယ်။ လောကရဲ့ ဆန်းသစ်မှုတွေ၊ အထိ အတွေ့တွေ၊ အသိအမြင်တွေကို သိစ၊ မြင်စ၊ တွေ့စ၊ မှတ်စဆိုတဲ့ ကာလမှာ နာရီသံကြီးနဲ့ အတူ ကိုယ်ပျော်ခဲ့တယ်။ စကားလုံး အသစ်တွေ ကြားရတော့မယ်။ အဖေပြောတဲ့ လူ့လောက ပုံပြင်တွေ ကြားရတော့မယ်။ အမေခွံ့တဲ့ ထမင်းနဲ့ ဟင်းကို စားရတော့မယ်။ အမေတိုက်တဲ့ ရေအေးကို သောက်ရတော့မယ်။ လွယ်အိတ်ကလေး လွယ်ပြီး ကျောင်းသွားရတော့မယ်။ နာရီသံတွေ၊ အချိန်တွေနဲ့ အတူပါ။ ကိုယ့်အဖေက သူ့စိတ်ကူးယဉ် ဘ၀တွေကို ကိုယ့်အတွက် ဖန်တီးပေးဖို့ ကြိုးပမ်းနေတယ်။ အဲဒီ ကာလရဲ့ အချိန် နာရီတွေမှာ ကိုယ်ဟာ ရွှေမင်းသားလေး။ ပျော်လိုက်တာ။ မြူးလိုက်တာ။ လန်းလိုက်တာ။ တက်ကြွလိုက်တာ။
နာရီတွေက ကိုယ့်ကို ကောင်းကောင်းကြီး စည်းရုံး သွားခဲ့ပြီ။

အိတ်ဆောင် နာရီလေး တစ်လုံးကို ကိုယ့် အဘိုးက ကိုယ့်ကိုပြလာတယ်။ သူ့အိတ်ဆောင် နာရီလေး အကြောင်းကိုလည်း ပြောပြတယ်။ နာရီလေးကြောင့် ဂုဏ်တင့်ခဲ့ရပုံတွေကို အဘိုးက ပုံပြင် တစ်ပုဒ်လို ပြောပြခဲ့တယ်။ ယောက်ျားလေး တစ်ယောက်က နာရီကောင်းကောင်း တစ်လုံး ရှိရတယ်။ အဘိုးက ကိုယ့်ကို ပြောခဲ့တယ်။

ကိုယ့်အဘွားက ကိုယ့်ကို နာရီ ခဏခဏ ကြည့်ခိုင်းတယ်။ ဘယ်နှနာရီ ထိုးပြီလဲ အမြဲ မေးတတ်တယ်။ အဘွားကို ညနေ ၅ နာရီ ထိုးရင် ပြောနော်။ နာရီစောင့်ကြည့်တဲ့ တာဝန်ကို အဘွားက ပေးတတ်တယ်။ သူကိုယ်တိုင်လည်း အိပ်ရာ ဘေးမှာ နာရီထား အိပ်တယ်။ ညဘက်တစ်ရေး နိုးရင် နိုးတဲ့အချိန် ဘယ်အချိန်လဲ ဆိုတာ သိလိုက် ရမှ အဘွားက ကျေနပ်တယ်။

ကိုယ့်အသက် ခုနစ်နှစ် ရောက်တော့ ကိုယ့်လက်မှာ လက်ပတ်နာရီ တစ်လုံး ရောက်လာတယ်။ ခုခေတ် ပြောပြောနေတဲ့ ဒီဂျစ်တယ်ဆိုတာ မျိုးပါ။ နာရီလေးက အချိန်တွေကို ဂဏန်းတွေနဲ့ ပြပေးတယ်။ အရောင်က ပန်းရောင်လေး၊ နာရီမှာ ဒစ်စနီလို့ ရေးထားတယ်။ ကလေးပတ် နာရီလေးပါ။ နာရီလေး ပတ်ပြီး အပြင်ထွက်တဲ့ အခါ ပတ်ဝန်းကျင်က ကိုယ့်နာရီ အကြောင်း မေးကြ တယ်။ ကိုယ်ကလည်း နာရီအကြောင်းကို ကြွားတယ်။ ကိုယ့်အဖေက နာရီလေးကို နယ်စပ်ကနေ ၀ယ်လာခဲ့တာ။ အဲဒီအချိန် ကာလက ခုလိုကလေး ကြိုက်လေးတွေ အတန်အသင့် ရှားတယ် ထင်ပါရဲ့။

နွေရာသီ ကျောင်းပိတ်ရက် တစ်ခုမှာ ကိုယ်မော်လမြိုင်မြို့ကို သွားလည်ခဲ့တယ်။ ကျောင်းဖွင့် ခါနီးလို့ ရန်ကုန်ကို အပြန်မှာ ကိုယ့်ဦးလေး တစ်ယောက်က ခရီးဆောင် အ၀တ်အိတ်ထဲကို လက်ပတ်နာရီတွေ အများကြီး ထည့်လိုက်တယ်။ ကိုယ့်ခရီးဆောင် အိတ်ထဲကိုလည်း လက်ပတ်နာရီတွေ အများကြီးလာထည့်တယ်။ မင်းကို နာရီ တစ်လုံးလက်ဆောင်ပေးမယ်ကွာ။ ကိုယ့်ဦးလေး က ကိုယ့်ကိုပြောခဲ့တယ်။ နာရီတွေက အများကြီး၊ ဘာလုပ်ဖို့လဲမသိ။ ကိုယ်အံ့သြခဲ့ရတယ်။ နာရီဆိုတာ ရောင်းဝယ်ပြုပြင် စီးပွား ရှာလို့ ရသကိုး။ ကာလ အတော်ကြာမှ ကိုယ်နားလည် ခဲ့တယ်။

လူပျိုပေါက် အရွယ် အလယ်တန်းကျောင်းသား ဘ၀မှာ။ မနက် ခြောက်နာရီ ထိုးပြီ အိပ်ရာ ထတော့၊ မနက်စောစော အိပ်ရာထရမယ်။ စော စောအိပ်၊ ဆယ်နာရီထိုးပြီ မနက်စာ ထကျက်ဖို့ အိပ်တော့၊ မနက်ခုနစ်နာရီ ကျောင်းတက်ရမယ်၊ ကျောင်းနောက်ကျနေပြီ မြန်မြန်သွား။ အချိန်နဲ့နှီး နွယ်နေတဲ့ အသံတွေအမိန့်တွေ ကြားနေရပြီ။ အချိန် လေးစားရမယ်။ အချိန်ကို မလေးစားတတ် ဘူးလား။ ကြားနေရပြီ။ ကိုယ်အချိန်တွေကို နည်းနည်း ရွံ့လာပြီ။ နည်းနည်းတွန့်လာပြီ။ အချိန်နဲ့အလုပ် လုပ်ရတာ စက်ရုပ်လို ဘ၀လို့ တွေးမိလာတယ်။

ရှစ်တန်းအောင်ရင် စီကိုဖိုက် နာရီတစ်လုံး လက်ဆောင်။
အလယ်တန်း ကျောင်းသားဘ၀၊ ရှစ်တန်း ဖြေခါနီးမှာ ကိုယ့်အဖေကကိုယ့်ကို စကားလက် ဆောင်တစ်ခု ပေးလာတယ်။ နာရီထဲမှာ စီကိုဖိုက် အကောင်းဆုံး ဟုတ်မဟုတ် ကိုယ်မသိ။ အဖေက စီကိုဖိုက်ဆိုတော့ ကိုယ်က လိုချင်တယ်။ စာကြည့်ရင်း ငိုက်လာခဲ့ရင် စီကိုဖိုက်လေး ပြေး ပြေး မြင်တယ်။ ကိုယ့်အဖေက ပညာရေးကို စီကိုဖိုက်နဲ့ စည်းရုံးသပေါ့။ လက်တွေ့ဘ၀ထဲ ခေါ်သွားပြီး ပညာမတတ်ခြင်းရဲ့ ဒုက္ခကိုလည်း ပြဖူးပါရဲ့။ ကိုယ်က အဖေ့ကို ပညာတတ်လည်း မထူးပါဘူး အဖေရယ်၊ ဆိုက်ကား နင်းတာမှ ကောင်းဦးမယ်လို့ စောဒက တက်မိတယ်။ အဖေက မျက်ထောင့်နီကြီးနဲ့ ခပ်ထန်ထန် ပြန်ပြော တယ်။ မတူဘူးလေကွာ။

ရှစ်တန်းအောင်တော့ နာရီတစ်လုံး ရခဲ့တယ်။ ကိုးတန်းကျောင်းသား ဘ၀အစမှာ ကိုယ့် ဆရာမက ကိုယ့်ဘယ်ဘက်လက်ကို လာကိုင်ပြီး သားနာရီလေးက လှလိုက်တာလို့ပြောလာတယ်။ ဟုတ်ကဲ့ ရှစ်တန်းအောင်လို့ အဖေ၀ယ်ပေးတာလို့ ခပ်ပြုံးပြုံး ပြောလိုက်တယ်။ တစ်ခါက အတန်းထဲမှာ နာရီဒိုင်ခွက်ပေါ်က မှန်ကို အပြိုင်အဆိုင် အုတ်နီခဲနဲ့ ထုပြီး ကိုယ့် သူငယ်ချင်းတွေ ပြိုင်ကြတယ်။သတ္တိ ဘယ်လောက်ရှိသလဲ ပြိုင်ကြတယ်။ ဘယ်လို သတ္တိမျိုးကို ပြိုင်သလဲ။ ကိုယ် နားမလည်ခဲ့။ ဟေ့ကောင် မင်းအလှည့်။ ကိုယ် ညင်ညင် သာသာလေး ခေါင်းယမ်း ငြင်းလိုက်တယ်။

ကိုယ် အထက်တန်းအောင်တော့ တစ်ဆယ့် ခြောက်နှစ်။ ကိုယ့်အဖေက သိမ်ဖြူလမ်းမှာရှိတဲ့ စီတီဇင် နာရီဆိုင်ကို ခေါ်သွားပြန်တယ်။ အဖေက ကိုယ့်ကို အဲဒီ ဆိုင်ခေါ်သွားတော့ ကိုယ်ပျော်ခဲ့တယ်။ ကိုယ့်ကိုစတီး ဘော်ဒီနဲ့ လက်ပတ်နာရီ တစ်လုံး ထပ်ဝယ်ပေးတယ်။ ကိုယ့်ကို ၀ယ်ပေးရတာ အဖေ့အတွက် သိပ်ကိုတန်ဖိုးများ နေလိမ့်မယ်။ လူငယ်အကြိုက် ဖန်စီနာရီမဟုတ်ဘူး။ လူလတ်၊ လူကြီးပိုင်း အထိသုံးလို့ရတဲ့ လက်ပတ်နာရီ ကောင်းကောင်းတစ်လုံးပဲ။ မင်း အထက်တန်း အောင်ပြီ။ တက္ကသိုလ် သွားရတော့မယ်။ ပြီးရင် လက်တွေ့ဘ၀ထဲကို ဆက်သွားရဦးမယ်။ မင်းတစ်သက်လုံး အဆင်ပြေနိုင်မယ့်၊ တစ်သက်လုံး သုံးနိုင် မယ့်နာရီတစ်လုံး ငါပေးလိုက်ပြီ ဆိုတဲ့ အဓိပ္ပာယ်တွေ ကိုယ့်အဖေမှာ ရှိနေတယ် ဆိုတာ အဖေ့နှုတ်က ထုတ်မပြောဘဲ ကိုယ်နားလည်ခဲ့တယ်။
ကိုယ်တို့ နာရီသွားဝယ်တဲ့ သိမ်ဖြူလမ်းက နာရီဆိုင်မှာ ကိုယ့်ရင်ခုန်သံ ရှိနေတယ် ဆိုတာ ကိုယ့်အဖေ သတိမထားမိဘူး။
အဲဒီနေ့က ကိုယ့်ရင်ခုန်သံ ခွင့်ယူထားလို့ အလုပ်မဆင်းခဲ့ဘူး။

လက်ပတ်နာရီလေးက နှစ်ပေါက်အောင် ကိုယ်နဲ့အတူ ရှိနေခဲ့တယ်။ လုပ်ငန်းခွင်ထဲ ရောက်တဲ့အထိပဲ။ တစ်ခါတလေ အလုပ်ခွင်ထဲက သူငယ်ချင်းတွေ ကိုယ့်နာရီလေးကို ခရီးသွားဟန်လွဲ သဘောနဲ့ ဝေဖန်ကြတယ်။ ကိုယ်ကတော့ ကိုယ့်အကြောင်းနဲ့ ကိုယ်၊ ကိုယ့် အမှတ်တရတွေနဲ့ကိုယ်၊ ခပ်ပြုံးပြုံး လေး နေခဲ့မိတယ်။

ကိုယ်ပိုင်လုပ်ငန်းတစ်ခု လုပ်ဖို့ ကိုယ်ကြိုးစားတယ်။ ကိုယ့်အဖေ၊ အစ်ကို အရင်းတမျှ ခင်မင်ရတဲ့ မိတ်ဆွေတွေက ကိုယ့်ကို ၀ိုင်းကြတယ်။ အလုပ် အတွက် ရုံးခန်းတစ်ခု စလုပ်တယ်။ ကိုယ်နဲ့ အလုပ်တွဲလုပ်တဲ့ သူငယ်ချင်းရဲ့ အစီအမံအရ တွက်ချက်လိုက်တော့။ ကိုယ်တို့ ရုံးခန်းမှာ နာရီ အ၀င်မခံရ။

ငါ့ညီ လုပ်ငန်းရှင် လုပ်မယ်ဆိုရင် အချိန်လေးစားဖို့ လိုတယ်ကွ။ တိုင်ကပ်နာရီ တစ်လုံး ကိုယ်တို့ ရုံးခန်းလေးထဲကို ဆိုက်ဆိုက်မြိုက်မြိုက် ရောက် လာတယ်။ ကိုယ့်အတွက် အလုပ်အတွက် အစစအရာရာ ကူညီပေးတဲ့ အစ်ကိုက လက်ဆောင်ပေးခဲ့တာ။ သူက အကောင်းကြိုက်တော့ နာရီကလည်း အကောင်းစားပါပဲ။ အစ်ကိုပေးတဲ့ လက်ဆောင်ကို လုံးလုံး မငြင်း။ ကိုယ်တို့ လက်ခံလိုက်တယ်။ သူငယ်ချင်းနှစ်ယောက် တစ်ယောက်ကို တစ်ယောက် ကြည့်ပြီး ပြုံးလိုက်ကြတယ်။ နာရီကိစ္စ မေ့မေ့ပျောက်ပျောက် ရှိခဲ့ကြတယ်။ ကိုယ်တို့ ကိုယ်ပိုင်လုပ်ငန်းလေး အထိုက်အလျောက် အောင်မြင်ခဲ့ပေမယ့် ကိုယ်တို့မှာရှိတဲ့ အင်အား၊ အသက်အရွယ်၊ တစ်ဇွတ်ထိုးစိတ်တွေနဲ့ ကိုယ်တို့ ကိုယ်ပိုင်လုပ်ငန်းလေး ရပ်တန့်သွားတယ်။

ကိုယ်ပိုင်လုပ်ငန်းလုပ်ခဲ့တဲ့ကာလတွေမှာ အချိန်တွေ၊ နာရီတွေကကိုယ်တို့ ကို ထိန်းချုပ်ခဲ့တယ်။ ကန့်သတ်ခဲ့တယ်။ တိုင်ကပ်နာရီကို တမော့မော့ကြည့်။ လက်ပတ်နာရီ တမြောက်မြောက်လုပ်လို့ အချိန်ရဲ့ကျေးကျွန် ဖြစ်ခဲ့ကြတယ်။ ကိုယ်တို့ လုပ်ငန်းလေး ရပ်တန့်သွားတော့ တိုင်ကပ်နာရီလေးကို တခြား ပစ္စည်းတွေနဲ့အတူ စိတ်ကျန်းမာရေးဆေးရုံကို သွားလှူဒါန်း လိုက်တယ်။ စိတ်ကျန်းမာရေး ဆေးရုံက ဝေဒနာရှင်တွေ အချိန်နာရီကို ချစ်သလား၊ မုန်းသလား၊ လိုချင်သလား၊ မလိုချင်ဘူးလား။ ကိုယ်တို့ မတွေးမိခဲ့။ မသိခဲ့အလှူ တစ်ခုအနေနဲ့ တိုင်ကပ်နာရီကို လှူဒါန်း လိုက်ကြတယ်။ ကိုယ်ပိုင်လုပ်ငန်း ရပ်တန့်ချိန်မှာလည်း အချိန်ကာလတွေနဲ့ ကိုယ်ရင်ဆိုင် ခဲ့ရတယ်။ လကုန်ရက်တွေမှာ ကိုယ့်မှတ်စုစာအုပ် လေးထဲကပေးရန်ရှိ ငွေစာရင်းတွေကို အနုတ်ပြ နိုင်ဖို့ ရင်ဆိုင်ခဲ့ရတယ်။ ကိုယ့်အဖေပေးခဲ့တဲ့ လူလားမြောက်မှု အသိ အမှတ်ပြု လက်ပတ်နာရီကတော့ ကိုယ့်ဘယ် လက်မှာ ရှိနေတုန်းပဲ။

ဒီနေ့ ဖောင်ပိတ်ရက်။ နေ့လယ် နှစ်နာရီရုံး တင်ရမယ်။ ဒီည ဖလင်ထုတ်မယ်။စာမူကို ငါးရက်နေ့ နောက်ဆုံးပေးပါ။ မီးက ဆယ့်တစ်နာရီမှာ ပျက်မှာ။ မနက်ငါးနာရီမှမီးပြန်လာမယ်။ မီးစက် မောင်းထားတာ ကြာနေပြီ။ တစ်နာရီလောက် နားလိုက်ဦးမယ်။ သွက်သွက်လုပ်ကြ။ စာအုပ်ထွက် နောက်ကျမယ်။ ကြော်ငြာရှင်တွေနဲ့ စကားများရ တော့မယ်။ ခုထိ စာမူခ ထုတ်လို့မရသေး ဘူးလား။ ဖွင့်ပွဲက ရှစ်နာရီမှာစမှာ၊ မနက်စောစောထ။ စာမူကို ငါးရက်နေ့ပေးမယ် ဆိုပြီး ခင်ဗျားကတိ မတည်ဘူး။ တက္ကစီ ငှားပြီးသွားရင် ငါတစ်နာရီ လောက်အိပ်ရမယ်။ အိပ်ချိန်ကို၂၅၀၀ နဲ့ဝယ်လိုက် မယ်ကွာ။ ဟာရတဲ့ စာမူခနဲ့ ကားငှားခနဲ့ မကိုက် ဘူးကွာ။ ဘာဖြစ်ဖြစ်ကွာ အချိန်နာရီကို ၂၅၀၀ နဲ့ ၀ယ်တယ်လို့ သဘော ထားလိုက်မယ်ကွာ။ အို့။ မုန်းဖို့ကောင်းတဲ့ အချိန်နာရီတွေ။ မုန်းလိုက်တာ။

နှိုးစက် ပေးလို့ရတယ်။ ဓာတ်ခဲလည်း သိပ်မစားဘူး။ ကိုယ့်ဦးလေးက နာရီအကြောင်း ရှင်းပြပြီး ကိုယ့်ကို လက်ဆောင်ပေးလာပြန်တယ်။ ကိုယ့်လက်မှာ စီတီဇင်နာရီလေး ပတ်ထားတုန်းပဲ။ နာရီက သိပ်ဈေးမကြီးပါဘူး။ လက်ဆောင် ပေးလို့ရအောင် ရွှေတိုက်ကနေ ငါဝယ်ထားတာ။ တစ်နှစ်လောက်တော့ အေးအေးဆေးဆေး ခံတယ်ကွ။ နှိုးစက်ပေးလို့ရတော့ မင်းအတွက် အဆင်ပြေ တာပေါ့။ ဓာတ်ခဲ ကုန်သွားလည်း ငါ့ဆီပြန်ယူခဲ့ ကွာ။ ဒီဦးလေးက တခြားဦးလေးတွေနဲ့ မတူ။ သူစီစဉ်ရင် ငြင်းရခက်တယ်။ အမှတ်တရဆိုရင် ခုံမင်တတ်တဲ့ ကိုယ့်စိတ်ကလေးပေါ်လာခဲ့တယ်။

ကာလတစ်ခုကြာတော့ နာရီလေး ရပ်သွား ခဲ့တယ်။ နာရီလေးကို တစ်ခုတ်တရ သိမ်းထား လိုက်တယ်။ စီတီဇင်နာရီလေး ကိုယ့်လက်ပေါ် ပြန်ရောက်လာပြန်တယ်။ ကိုယ်က အမှုမဲ့၊ အမှတ်မဲ့။ ဂရုတစိုက် ရှိတတ်တဲ့ ကိုယ့်ဦးလေးက လက်ပတ်နာရီ ပြောင်းနေတာကို သတိထားမိ သွားတယ်။ လက်ပတ်နာရီ အကြောင်း မေးတယ်။ ပြောပြခဲ့တယ်။ ငါ့ပြန်ပေး ငါကြည့်ပေးမယ်။ ကိုယ်ပြန်ပေးလိုက်တယ်။ နောက်တစ်နေ့ကျတော့ နာရီလေးကို ပြုပြင်တဲ့အကြောင်း ဆယ်မိနစ်၊ ဆယ့်ငါးမိနစ်လောက် ကိုယ့်ကို ရှင်းပြတယ်။

ဦးလေးအနေနဲ့ နာရီပြင်တဲ့အလုပ်ကို အချိန် ပေးပြီး လုပ်ရမှာ မဟုတ်။ သူ့အလုပ်လည်း မဟုတ်။ သူလုပ်ပုံ ကိုင်ပုံ။ စဉ်းစားခန်းဝင်ပုံနဲ့ ဆိုရင် နာရီပြင်ဖို့ တစ်နာရီနဲ့ မနည်းကြာမယ်။ ကိုယ့်ကို ပြန်ရှင်းရတဲ့ အချိန်ပါ ထည့်တွက်ရင် တစ်နာရီနဲ့ နှစ်နာရီထက် မနည်းကြာလိမ့်မယ်။ ဦးလေး ကိုယ်တိုင် မပြင်ဘဲ နာရီပြင်ဆိုင် ပို့ခဲ့ရင် နာရီပြင်ဖို့ အချိန် နာရီဝက်ထက် ပိုမှာ မဟုတ်။ အချိန် နှစ်နာရီဟာ ဦးလေးရဲ့အလုပ်တွေကို အတန် အသင့် ပြီးနိုင်တယ်။ ဦးလေးနဲ့ ခက်ပါတယ်လို့ ကိုယ်တွေးနေမိတယ်။

ဘဘကြီးက ကားပြင်နေရင် တစ်နေ့လုံး တစ်ညလုံး ပြင်နေတော့တာ။ ဘကြီးတို့က ဘဘ ကြီးနှယ် ဘာလို့ ဒီအလုပ်လုပ်နေရတာလဲ။ သူ့ အလုပ်မှ မဟုတ်တာလို့တွေးတယ်။ ကိုယ့်ဦးလေး ရဲ့အဖေ သူ့ကားပြင်တဲ့ အကြောင်း ကိုယ့်ဘကြီး ပြန်ပြောပြတာကို အတွေးရောက်သွားတယ်။ ခုမှ ဘကြီးတို့လည်း ဘဘကြီးကို နားလည်တော့တယ်။ အနုပညာ သမားဆိုတာ ဒီလိုပဲကွ။ သူ့စိတ်ဝင်စားတာ၊ သူခုံမင်တာ၊ သူစိတ်ပျော်ရာကိုလုပ်ချင်လုပ် နေတာ။ သူစိတ်စေ စားရာကို လုပ်နေတာပေါ့။

နားလည်လိုက်ပြီ။ သဘောပေါက်ပြီ။ သူတို့က အချိန်ကို မလေးစားတာ မဟုတ်။ တန်ဖိုး မထားတာ မဟုတ်။ သိပ်လေးစား၊ သိပ်တန်ဖိုး ထားတဲ့ လူတွေ။ သူတို့ဟာ သူတို့ စိတ်ကျက်စား ရာကို လုပ်နေကြတာ။ အချိန်တွေရဲ့ ခိုင်းစေတာကို လုပ်နေတာ မဟုတ်ဘူး။ သူတို့ဘ၀ သူတို့အချိန် တွေကို အနိုင်ယူနေတာ။ စိတ်ရဲ့စေစားရာ အတွက် အချိန်တွေကို သုံးနေတာ။ အချိန်တွေက သူတို့ကို ခိုင်းနေတာ မဟုတ်ဘူး။

ကိုယ့်ဦးလေးပေးတဲ့ နာရီလေး သက်တမ်း ကုန်သွားတယ်။ ဦးလေးက နောက်ထပ်နာရီ တစ်လုံး ကိုယ့်ကို ထပ်ပေးပြန်တယ်။ နာရီအကြောင်း လည်း ထပ်ရှင်းပြတယ်။ ဆယ့်လေးငါး မိနစ်လောက်။ ကိုယ်တို့ ၀န်းကျင်မှာ နာရီတွေ အများကြီး ရှိတယ်။ မြို့လယ် လမ်းမတွေမှာ၊ ရုံးခန်းတွေမှာ၊ အိမ်တွေမှာ၊ လက်ကိုင်ဖုန်းထဲမှာ၊ ကွန်ပျူတာထဲမှာ။ အို ကိုယ်တို့နားမှာ နာရီတွေ ၀ိုင်းရံနေပါလား။ အချိန်တွေ ရှားပါးနေပါလား။ တချို့လည်း အချိန် တွေ ပိုနေကောင်းပါရဲ့။ လူတွေကို ညီတူမျှတူ ပေးထားတဲ့ အချိန်က နှစ်ဆယ့်လေးနာရီ။

ကိုယ်ကတော့ နာရီတွေနဲ့ ပတ်သက်ပြီး သိပ်မခံစားတော့ဘူး။ နာရီဆိုတာ အသုံးအဆောင် တစ်ခုပဲ။ နာရီဆိုတာ ဂုဏ်တစ်ခု အတွက် မဟုတ် ဘူး။ အချိန်မှန်ရင် ပြီးတာပဲ။ နာရီတွေကို ချစ်တဲ့ လူလည်း ရှိမှာပဲ။ ဒါလည်း လူတစ်ယောက်ရဲ့ လွတ်လပ်ခွင့်ပဲ။ သူတို့ရဲ့ ၀ါသနာပဲ။ နာရီတွေဟာ သူတို့ဘ၀အတွက် အနုပညာပစ္စည်း ဖြစ်ကောင်း ဖြစ်နေလိမ့်မယ်။ ကိုယ်ကတော့ အချိန်တွေကို တစ်ခါတလေ မုန်းလိုက်၊ ချစ်လိုက်။ တစ်ခါ တလေ စိတ်ကောက်လိုက်၊ ပြန်ချော့လိုက်နဲ့ ဖြတ်သန်းနေမိတယ်။ နာရီ ဆိုတာကို မေ့တေ့တေ့ ဖြစ်နေခဲ့တယ်။

ကိုယ့်ဘ၀ထဲကို နာရီတစ်လုံး ရောက်ဖို့ အကြောင်းဖန်လာခဲ့တယ်။ ဒါကလည်း အမှတ်တရ တစ်ခုပါပဲ။ ဒီနာရီလေး ရခဲ့တဲ့ နေရာ၊ အချိန်၊ အခြေအနေတွေဟာ ကိုယ့်အတွက်အမှတ်ရစရာပဲ။ ကံစမ်းမဲဆိုတာ ကိုယ့်ဘ၀မှာ ပေါက်ခဲတယ်။ ကံစမ်းမဲ ပေါက်လေ့ပေါက်ထမရှိ။ ကံစမ်းမဲ ထမ်းလာတာ မမြင်ရ၊ နာရီထမ်းလာ တာမြင်ရ ဆိုရမလို နာရီတစ်လုံး ကံစမ်းမဲပေါက် ပြန်တယ်။

ဒီကောင် ကံတက်နေတယ်။ ကံကောင်းချင်တော့ နာရီကံစမ်းမဲ ပေါက်တယ်။ ကံဆိုးချင်တော့ နာရီက မိန်းမပတ် ဖြစ်နေတယ်။ ဒီကောင့်မှာ နာရီ ပေးစရာမိန်းကလေးလည်း မရှိဘူး။ လှောင်ကြပြီ။ စကြ နောက်ကြပြီ။ ဟုတ်တယ်။ မိန်းမပတ် နာရီဆိုတော့ ဒီနာရီကို ကိုယ်ပတ်လို့ မဖြစ်။ ပတ် တော့ ဘာဖြစ်လဲ။ ဘာမှ မဖြစ်ဘူး။ ကိုယ့်ကိုမာမီ ဆိုပြီး ထပ်လှောင်ကြမယ်။ ဒါဆို ဒါလည်းမဖြစ်။

ကိုယ့်အတွေးက မဝေးသေးတဲ့ အတိတ် တစ်နေရာဆီ ရောက်သွားတယ်။ သူမဆီကိုပေါ့။ သူမနဲ့ကိုယ် စကားစမြည် ပြောကြဖို့ မကြာခဏ ဆိုသလို ဆုံတတ်ကြတယ်။ ကိုယ်က သူ့အတွက် အချိန်တွေအများကြီးဖဲ့ပေးခဲ့တယ်။ ကျေကျေနပ်နပ် ပျော်ပျော်ရွှင်ရွင်ကြီးပေါ့။ ကိုယ်တို့ဆုံဖို့ ချိန်းလိုက်ကြတိုင်း ချိန်းဆိုချိန် မရောက်ခင် ဆယ့်ငါးမိနစ် အလို၊ ချိန်းတဲ့ နေရာကို ကိုယ်ရောက်အောင် သွားတယ်။ သူမက ချိန်းဆိုချိန်ထက် အနည်းဆုံးနာရီဝက်၊ အများဆုံးလေးဆယ့် ငါးမိနစ်နဲ့ တစ်နာရီမှ ရောက်လာတတ်တယ်။ ဒါတွေကို ကိုယ်မသိ။ ကိုယ်က ကိုယ့်စိတ်ကူးနဲ့ကိုယ် ဘ၀င်လေဟပ်ပြီး စိတ်ကူးလှလှတွေ ယဉ်နေခဲ့တယ်။

သူမ ကိုယ့်ကိုလက်ခံတဲ့နေ့ နာရီတစ်လုံး အမှတ်တရ လက်ဆောင်ပေးမယ်။ ဟုတ်တယ်။ ကံကောင်းလို့ နာရီတစ်လုံး ကံစမ်းမဲ ပေါက်ခဲ့တယ်။ ကံစမ်းမဲပေါက်တဲ့ နာရီက မိန်းမပတ်ဖြစ်နေတယ်။ မိန်းမပတ်နာရီ ဖြစ်နေတာကလည်း ကိုယ်ကံမဆိုးဘူး။ ကိုယ့်စိတ်ကူးထဲမှာ ရေကန်အသင့် ကြာ အသင့် ချိန်ခါကိုက်ပါပဲ။
နာရီထည့်ထားတဲ့ အညိုရောင် ဘူးခွံပေါ်က ဖဲကြိုးလေးကိုဖြေ၊ နာရီဘူး ထဲက လက်ပတ်နာရီ သေးသွယ်သွယ်ကိုထုတ်။ သူမရဲ့ ဘယ်ဘက် လက် ကလေးကို တယုတယ ဆွဲယူ။ ကိုယ့်နှုတ်ကလည်း ညီမကို တွေ့ရဖို့ အစ်ကို အချိန်တွေ အများကြီး စောင့်ခဲ့ရတယ်။ ဒါကို ညီမ အမြဲသတိရနေဖို့ အစ်ကိုရဲ့ လက်ဆောင် လို့ တတွတ်တွတ် ပြောရင်းပေါ့။

တကယ်တော့ ကိုယ့်စိတ်ကူးတွေနဲ့ ကံတရားတွေဟာ ချိန်ခါကိုက် ဖြစ်ခဲ့တယ်။ ကိုယ့်ကို လှည့်သွားတာက ကာလမတူတဲ့ ကံကောင်းခြင်းနဲ့ ကံဆိုးခြင်းပဲ။ သူတို့ဟာ အချိန်တွေ လွှဲပြီး လာခဲ့ကြတယ်။ မဝေးသေးတဲ့ အတိတ်တစ်ခုမှာ သူမက ကိုယ့်ကို ညင်ညင်သာသာလေး ချွေးသိပ်သွားခဲ့ တယ်။ နေမြင့်အရူးရင့် ဖြစ်ခဲ့ပြီ။

ကိုယ့်စားပွဲပေါ်က မိန်းမပတ် နာရီလေးဘေးမှာ ဆီးချိုသွေးချို တိုင်းတဲ့ စက်လေး ရောက်နေတယ်။ အမေ့အတွက် ညီမလေး ၀ယ်လာတာ ဖြစ်မယ်။ တစ်နေ့ကပဲ ကိုယ့်ညီမလေးနဲ့ အမေ့အတွက် ဆီးချိုသွေးချို တိုင်းတဲ့ စက်ဝယ်ဖို့ တိုင်ပင်ကြတယ်။ ကိုယ်က ဈေးစုံစမ်း ခိုင်းလိုက်တယ်။ ကိုယ့်ညီမလေးက တစ်ခါတည်း ၀ယ်လာတယ် ထင်ပါရဲ့။ ဈေးနှုန်းကြည့်လိုက်တော့ သုံးသောင်း။ ညီမလေးက အမေ့အတွက် ကိုကိုဝယ်ပေးလိုက် ဆိုခဲ့ရင် ကိုယ် စာမူ ဆယ်ပုဒ်လောက် ရေးရလိမ့်မယ်။

ကိုယ် ပြုံးလိုက်မိတယ်။ ကိုယ့်မိသားစုအတွက် လိုအပ်နေတာက ဆီးချို သွေးချိုတိုင်းစက်။ ကိုယ်ယူလာတာက မိန်းမပတ် နာရီတစ်လုံးနဲ့ အူကြောင်ကြောင် စိတ်ကူးအတွေးတွေ။ နာရီဆိုတာကလည်း ကိုယ်ဝယ်လာတာ မဟုတ်။ ၀ယ်ရမယ် ဆိုရင်လည်း ကိုယ်မ၀ယ်နိုင်။ ဆီးချိုသွေးချို တိုင်းစက်လည်း ထိုနည်းလည်းကောင်း ကိုယ်မ၀ယ်နိုင်။ ကံစမ်းမဲပေါက်တဲ့ မိန်းမပတ် နာရီက ညီမလေး လက်ထဲ အော်တိုရောက် သွားတယ်။ မဆိုးပါဘူး။ ဧည့်ခံပွဲလေး ဘာလေးရှိရင် ညီမလေး ပတ်လို့ရတာပေါ့။ ညီမလေးက ဆိုတယ်။ တော်သေး။ ကိုယ့်အကြောင်းတွေများ ခရေစေ့ တွင်းကျ သိသွားရင်။ ကိုယ့်ညီမလေးက ကိုကိုငပေါကြီး လို့ ချီးမွမ်းနေမှာ။

နာရီတွေ၊ အချိန်တွေ သင်တို့ဟာ နောက်ပြန်လှည့်ခွင့် မရှိ။ သင်တို့ နောက်ပြန်လှည့်ခွင့်များ ရှိခဲ့ရင် ကျောင်းခန်းထဲက အချိန်တွေဆီကို ကိုယ့်အတွက် ပြန်လှည့်ပေးပါ။ ပြန်ပို့ပေးပါ။ ကျောင်းခန်းထဲမှာ သူ့မျက်နှာကို ကိုယ်ခိုးခိုး ကြည့်ခဲ့တယ် ဆိုတာ သူ မသိသေးဘူး။ ဒီတစ်ခါ သူသတိထား မိလောက်အောင် ငေးနေလိုက်ချင်တယ်။